串燒咖啡 (已結業)

今日同朋友講起以前成日去café玩hea時間既日子，於是我地係旺角行完街就係就近搵左呢間串燒咖啡，一上到去見到個牌寫住”特別能吃苦”再見到下面個句，笑左出黎。呢度裝修比較暗，地方唔大，幾適合倩侶同小圈子飯聚既地方，但係我地今次就一大班人去就顯得特別嘈，哈哈。因為我對串燒無咩興趣，所以我自己就叫左個意粉食住先，睇到個餐牌好多唔同既意粉，最後叫左個意式辣肉腸意粉，見佢紅紅地色應該幾開胃，仲左杯OREO曲奇沙冰。意式辣肉腸意粉，單睇賣相以一間串燒為主既CAFÉ黎講，係幾有心機，意粉煮得岩岩好唔淋唔硬，食落去有咸咸地，連埋D辣肉腸咸咸辣辣咁，值得叫人再黎多次。再講下個OREO曲奇沙冰，一般以出飲品店既沙冰黎通常到手個陣D冰已經融得七七八八，但係呢杯無，而且佢既OREO味好濃，D沙冰好棉，飲到好滿足，襯返塊OREO，好貼題。食到差唔多緊係到食甜品既時候啦，我揀個朱古力遊艇，見佢話店長推介係要等15分鐘，呢個甜品以朱古力為主，個底係一塊餅，上面就就加左好多朱古力既野，有OREO、朱古力醬、石板街雪糕、朱古力脆脆，岩哂鐘意食甜野既我，餅加朱古力成件事好邪惡。