樂天皇朝 (利舞臺廣場) (已搬遷) 新店位置

趁平日放假，兩點半來歎下午茶，該時段除餐牌主菜甜品外，小籠包、小點、湯品麵食等一律半價，優惠吸引抵食，難怪全場滿座。此店環境闊落光線柔和，宮廷氣派歎下午茶感覺正。點了三款必食之選，樣樣都咁好味。特色皇朝小籠包(八色) $59一籠八色好吸睛，未食已先加分。小籠包皮很簿，一不小心好易篤穿。八種味道包括原味、蒜香、絲瓜、鵝肝、川味、芝士、蟹粉、黑松露，口味各具特式。首選芝士味，少許拉絲效果，趁熱烘烘食為佳。次選蟹粉，雖則蟹黃味不算濃，淡淡蟹粉溶入湯汁確係好味。此外，黑松露一咬散發松露芳香令人難忘。半價食到高水準小籠包好抵。另外枱上有薑絲同醋可自行添加以供個人口喜好。芝麻醬油麥菜 $33雖然菜式簡單，但每次都必定叫，薄薄青瓜片捲住油麥菜，沾上芝麻醬，咬下爽脆非常，芝麻醬的美味令人食唔停口，一碟有九條食得健康清新，以半價食到真係超抵食。龍華素鴨 $34素鵝食得多，素鴨首次食，同樣以豆製品，類似千層豆腐皮。夾起來很軟身，咬落不覺韌。腐皮很索鹵水汁，無論口感和味道與鹵水鴨好相近，做得十分出色，半價真係好抵好抵食。