朝天門

營業中

休息中

今日同同事去中環嘅「朝天門」試咗佢哋嘅商務午市套餐，真係有驚喜！首先個「非遺鴛鴦鍋」一上枱已經霸氣十足，紅油鍋嗰邊係招牌牛油湯底，麻香勁道但唔會嗆喉，另一邊揀咗菌湯，鮮甜得嚟平衡返辣味，啱晒我哋呢班又想食辣又怕太刺激嘅人。最正係個鍋中間仲有個玉璽造型嘅蓋，打卡一流之餘，仲呼應返餐廳「朝天門」嘅歷史故事，食個火鍋都食出文化感！餐前小點嘅「重慶小吃組合」非常之特別嘅重慶小食有白色嘅米糕，長條型嘅脆脆同埋怪味豆「特色三拼」集合晒鮮毛肚、冰川鵝腸同「烽火戲諸侯」（黃喉）。毛肚真係名不虛傳，大大塊又夠厚身，烚十秒左右入口爽脆到「嗦嗦聲」，完全冇雪藏味，果然係重慶火鍋嘅靈魂！鵝腸處理得乾淨，冰鎮住上枱，灼完仲保持到脆度，正！黃喉擺喺個迷你烽火台裝飾上面，玩味十足，口感彈牙有嚼勁，同事話似食緊「脆口版豬頸肉」咁過癮。另外「丸滑拼盤」有手打蝦滑同墨魚滑，真材實料，蝦滑仲食到粒粒蝦肉；「肉多多午餐肉」唔係普通罐頭貨，厚切煎香過，有肉香又唔會太鹹；「精品翼板肉」油脂分布均勻，輕輕一灼就食到牛味，唔使點醬都夠正。菌菇拼盤有齊金針菇、鮮冬菇同平菇，新鮮爽甜，尤其吸咗菌湯之後更加鮮味；茼蒿菜嫩綠無渣，解膩一流。