見見面 (已結業)

出面好多地方標榜自己D辣幾勁幾勁，可惜都係一味死辣，只係得個勁度，但係就無晒味道，不過呢一間九龍城小店就唔同，個辣好有層次感，同埋食得出辣椒之外，仲有其他香料嘅味道。送啤酒必備︰辣子肥腸，睇吓幅相D辣椒，堅正，喺個椒海度摷D肥腸出黎都幾過癮。呢個肥腸最特別嘅地方就係無晒D肥膏，如果想食腸但係又怕肥膏嘅就啱晒，辣椒味當然勁，但係舊肥腸又保留到D腸味，無比D辣椒蓋過晒佢D味，好野。跟住叫咗酸菜魚，條魚可以揀桂花或者龍躉，我地揀咗龍躉，食落都幾好，肉質彈牙，魚身都滑(不過當然無桂花魚咁滑啦)，而且比想像中少骨。個酸菜湯都好惹味，酸酸辣辣幾好食。甜品就叫咗桂花冰粉，第一次食又幾好食，感覺上就係透明嘅涼粉。冰粉本身無味嘅，不過撈埋D糖漿之後又真係唔錯，加埋少少桂花，又清香又可以解下辣。