碗碗香 (已結業)

今次同朋友嚟到呢一間碗碗香食正宗貴林牛肉粉，大廚同侍應都係以鄉下話溝通，感覺夠地道。同朋友兩個人叫咗紅油牛肉粉（微辣）同清湯牛肉粉配兩杯苦丁茶。首先試咗清湯湯底，湯底加左花椒粉同胡椒粉，所以即使唔係食麻辣湯底，依然會有舌頭麻痹嘅感覺（注：麻辣的麻味來自花椒，辣味來自辣椒），清湯得來又唔會太清淡。至於紅油湯底，湯底落咗辣椒油，呢個就辣味比較重而無麻味，同時亦落左酸菜，識落酸酸辣辣，非常開胃，如果鍾意酸味較重嘅人可以要求加酸菜！兩碗牛肉粉都用左牛腩同牛肉片作為配料，兩者肥瘦適中，肉質非常軟嫩，份量都夠多。而米粉比較粗身，粗幼度同烏冬差唔多，食落夠滑溜彈牙！如果食到覺得好辣，可以飲苦丁茶，有清熱下火嘅功效，飲完的確非常解辣。