金滿仔 (已結業)

一直以嚟，都好想搵返細個响街邊檔食過嘅豬油渣麵/粉仔。走訪過好多自稱正宗、真正油渣麵/粉仔嘅食肆，最終只有失望而回...以為呢種麵已經失傳。今日行過呢度，望落似新開無耐嘅舖頭。又係寫住正宗粉仔，冇理由唔俾個機會佢。近年食到嘅油渣麵，都係一舊一舊小豬膏，又腍又肥。呢度食到嘅，真係脆卜卜嘅小油粒。湯底係比較"杰"，味道幾濃郁。跟餐有串燒，叫咗雞腎。切得太厚，好在都幾爽。辣味太濃，食唔到其他味道...整體好滿意，要响佢紅起嚟之前，帶太太嚟試吓！p.s. 散叫一碗粉仔都係$15，抵食！