龍門冰室 (已結業)

而家咁既時勢，用銀紙懲罰黃店並唔係無原因。今日幾經辛苦排左陣隊終於品嚐到龍門美食，係值得既。首先我地叫左個檸蜜脆豬餐，脆豬配上檸蜜汁真係好正。然後我地再叫個常餐茄湯通配鮑片火腿同炒蛋， 茄味香濃，炒蛋嫩滑，呢d香港特色，地道茶記水準，正正係大家愛香港懲罰龍門既原因之一。跟住我地叫埋個瑞士汁雞翼湯公仔麵配炒蛋同奶醬多。甜蜜蜜既瑞士汁同雞翼真係絕配，亦係香港獨有。仲有香脆既奶醬多，每食一啖都充滿著擁有百幾年歷史既香港城市特色。食完兩個餐都未夠喉，當然要試埋呢度既鹵水雞脾啦。 鹵水雞脾同炸脾相比當然無咁香口啦，但勝在唔熱氣之餘仲散發住淡淡既鹵水味，好比滿溢既香港情懷。紅豆冰同熱杏霜，可謂長期寫入茶記飲品list入面。呢度既紅豆冰，紅豆粒粒分明，椰奶香濃，果然係我兒時至愛。熱杏霜既獨特香氣，每每令人回想起獨特既香港，總之，正如龍門冰室張單所寫咁：香港加油！