富臨皇宮 (已結業)

一年一度都預左茶樓加價，無所謂嘅當係比人賺下啦，是日無左特價點心，正常點心加價，茶錢亦加到9蚊位。叉燒餐包（$28）本來中點（$17.8）的叉燒餐包加到$28，哈哈，價格大幅上漲，不過新出爐熱辣辣軟綿綿都幾好味。豉汁蒸鳳爪（$28）鳳爪好入味，醬汁好濃，最緊要係媽媽至愛呢款點心嘛。家鄉鹹肉粽（$48）上枱時隻粽仲係包實，點心呀姐話係咁㗎，衞生吖嘛，茶樓係不會拆開的。係㗎咩？印象中好似一向都拆開賣？Anyways，隻粽幾好食，鹹鹹地入面有肥豬肉，鹹蛋黃咁，仲混左紅綠豆，軟綿綿口感不錯。燕窩燉椰皇（$58）甜品價錢都升級左，啲料當然亦矜貴左。啲燉奶好有椰香，確實好味過平時的雙皮奶，但燕窩個人唔識欣賞，鹹鹹地腥腥地咁，奇奇怪怪？母親節點心紙坐位上無價錢牌，要睇返單先知加左幾多，雖然都預左，但比平時真係貴左好多（苦笑）。叉燒餐包入左榴槤包，櫃檯話係一樣嘅，呀…原來仲食左腸粉無影相，唔唔…兩百蚊兩個人，ok啦。