牛布拉日式牛肉麵 (已結業)

牛布拉呢個名，即刻令人諗起布拉腸粉，係以皮薄為佳嘅，即係啲牛肉好薄啦？對我黎講唔算係賣點黎，但係見佢個 lunch set 又好似幾平幾多野食，就入去試下。個三色刺身飯其實真係唔錯，三舊刺身新鮮，濕潤，都算大舊，開胃。碗醋飯調味都有水準，食完就更開胃。食完飯先食返沙律同麵豉湯，冇跟次序嘅，呢兩樣就比較失色，沙律醬略嫌少，唔夠味。湯似乎亦都稀咗啲，冇麵豉應有嘅濃重口感。但係最後上碗麵就幾有水準喇，係佢嘅招牌牛布拉拌拉麵，有三塊薄牛肉，幾大塊嘅，雖然薄，但都食到豐富肉味啵。麵夠粗身，冇梘水味，咬落又夠彈牙，已經合格有突啦，佢仲有啲肉碎比你撈添。仲有杯汽水送，夠多野食喇啩，咁究竟有幾平呢？88蚊加一，新張九折，即係都係88蚊，唔好話旺角，放喺香港任何一點都係平。