Yogo Frozen Yogurt (已結業)

以前肥髀游完水，一定會去呢度食乳酪，自從轉咗地方學，已經好耐無嚟過，今日經過，肥髀當然唔放過緬懷嘅機會上一年好興食乳酪，當時開咗好多乳酪店，不過熱潮一過，已經摺咗好多間，呢間以前由職員幫手唧乳酪同埋配料，今次嚟已經可以自己動手「畢」配料，職員只唧乳酪！肥髀揀咗佢至愛士多啤梨乳酪，唧乳酪嘅姐姐見佢細，只係唧一小團比佢，佢自己揀咗椰果，桃肉，同埋芒果，我平時唔比佢揀糖果類嘅配料（因為我覺得既然乳酪係健康食品，配料又揀曬啲糖果朱古力，又有乜意思）今次比佢揀一款糖果，佢揀咗熊仔糖！然後先去最尾嘅櫃枱秤，依重量比錢，今次$23!乳酪味道同以前無乜分別，因為呢間聲稱唔會額外加糖（即係乳酪嘅甜味來自水果本身），所以唔會太甜，但唔係每種水果都夾乳酪，之前試過南瓜芋頭呢啲甜味不強嘅蔬菜類，味道唔太突出！但配料種類以前以水果為主，水果種類亦多，貴啲嘅藍苺草苺都有，但今次就見唔到呢啲水果（或者今日咁啱無？），仲多咗糖果類同粟米片嘅配料佔嘅比例大咗！所以覺得比以前遜色！