鮨處松戶 (彩星集團大廈)

營業中

休息中

通常喺公司附近放工之後一班朋友約食飯，好容易選擇日本菜，一係約韓國菜，不過當然日本菜係九成時間嘅選擇，今晚同事話嚟食飯，於是就喺廣東道附近一路搵，搵吓啲新餐廳。廣東道Apple樓上嘅商業大廈原來有間開咗一段時間嘅日本居酒屋同食廚師發辦嘅餐廳，夜晚七點幾去到，竟然差唔多全場滿座，勁多商務客。幾個人當然樣樣都叫啲，叫刺身同熟食。先來一個沙律，好簡單嘅蕃茄豆腐沙律，呢個冇乜特別，純粹開下胃。我哋叫咗一個刺身拼盤，有好多唔同嘅刺身，海膽、拖羅、赤貝仲有一啲比較特別嘅魚生。另外叫咗熟食，好似南蠻雞都幾好。我最鍾意食魚，於是叫咗份燒白鱔，都處理得幾好。松前燒，真係無聽過，仲要係白子，熱食加青檸真係幾特別。我鍾意食油份高嘅魚，所以加咗份左口魚裙邊，好正。仲叫咗份燒魷魚，肉地煙韌彈牙，火候啱啱好。尾聲叫咗個炒飯，幾有鑊氣。呢度氣氛幾好，價錢又相宜，係唔錯嘅選擇。