Home Sweet Home (已結業)

朋友生日話想食牛扒，所以就揀咗間西餐廳同佢慶祝！一入到去就聞到陣淡淡的lemon grass嘅味道，令人覺得好舒服！咁我哋就叫咗兩個set dinner，朋友揀咗佢想食嘅牛扒，我就揀咗個羊架！咁個set呢其實就包前菜啦餐湯，一杯嘢飲同埋甜品嘅！飲品我哋叫咗一杯洛神花同一杯玫瑰荔枝露，杯玫瑰荔枝露嘅玫瑰味都幾濃，係幾好飲嘅！咁個前菜同餐湯呢其實就係一個長碟擺晒三樣嘢嘅，我又估唔到個餐湯係細細杯嘅波菜龍蝦湯，雖然個湯成杯都係綠色，但係飲落去龍蝦味係超濃嘅！咁朋友叫過主菜係芝士焗龍蝦併澳洲和牛柳，咁我都試咗一舊和牛，食得出係靚牛肉嚟嘅，牛味濃而且唔硬，係唔錯嘅咁我叫咗個烤羊架，上到嚟比想像中大件好多！而且佢係碟邊仲放咗少少黃芥辣同薄荷啫喱，而家好多餐廳都冇比呢啲醬，我一向覺得羊架係要點薄荷啫喱先至係絕配！個羊架都好易切開，肉質一啲都唔會韌而且唔騷，配埋薄荷啫喱食好夾！最尾個甜品就幾得意嘅，好似棒棒糖咁，咁原來入邊係芝士蛋糕嚟嘅！