火鍋隨意門

營業中

休息中

今晚同朋友去左鵝頸橋呢邊打邊爐，入黎見到滿屋氫氣球同彩燈嘅裝潢好有氣氛，枱面放滿充滿地中海風情嘅餐具，好似去左土耳其咁樣，有去左旅行嘅感覺。鍋底選左卜卜蜆鍋，一上枱係滿滿嘅煙霧一探鍋底，係滿滿大蜆，充滿清酒嘅香味。蜆肉好肥美，一爆殼就食得，d 肉好嫩，而且無沙，蜆都係比人幫手整好好多，街市買嘅蜆d 沙點吐都吐唔清..... 呢度就完全無呢個擔心，而且仲嫩滑鮮甜。牛肉拼盤可以試多幾款唔同肉類，有A4和牛片，安格斯，牛舌片，和牛粒，仲有比較罕見嘅部位，牛胸尖同牛動脈，真係食得叼鑽！份量好足，足夠3至4人分享。A4 和牛片，肉味香。珊瑚蚌鮮嫩彈牙，桂花蚌都好新鮮。黃金雙拼係咸蛋黃炸魚皮拼響鈴，即叫即製，上枱熱辣辣，非常香脆。魚腐夠大粒，肉質夠滑，吸收卜卜蜆湯底嘅鮮甜味道。竹蔗茅根嘅容器好靚，地球儀咁，冰凍潤甜，夠3至4人分享，2款都係火鍋必選。地點方便，座位闊落，鍋底鮮甜，用料新鮮，選擇多，打邊爐唔錯嘅選擇。