雲來軒 (已結業)

當日係補祝家人生日，4個人都好耐無去過雲來軒，一於睇吓過咗幾年後水準是否依舊。去到之後，加茶執枱的姐姐好殷勤，但覺得環境好似舊咗啲，講到底食物最緊要，我哋叫咗一個湯加五個餸。個例湯係烏雞冬瓜紅蘿蔔瑤柱螺頭，好好飲，幾濃，食唔出味精。金磚豆腐熱辣辣，外脆內軟，果然係招牌菜🙌🙌窩粑海斑球，米通好鬆脆，魚係炸的，外層有一啲酸酸甜甜嘅汁好屬於清新型，食到魚嘅鮮味🤩水芙蓉蒸明蝦球咁多年來水準依然，蛋白超級滑，蝦好爽，送飯一流👍新會陳皮香酥骨，我個人非常滿意呢道菜，唔油膩，好鬆化，炸粉又唔會太厚，有一少少陳皮伴住好香，可以多啲陳皮就好，就咁食啲肉已經好好食，我連醬都唔記得咗點🤟最後係話梅雞，用個鐵缽上，夠晒熱，味道不過不失，有啲失望，個汁食唔到梅味，好似冇乜特色。