富山居 (裝修中)

今晚試了這家新開的日式餐廳，我們一行四人叫了三文魚壽司兩客(因為一客有兩件)、一客細size蟹籽沙律、一客鰻魚炒飯、一客大板燒醬油豚肉炒麵、一客燒鯖魚同埋一份日式煎餃子。最先到當然是三文魚壽司，質素ok，$18兩件就是這個味道吧。鰻魚炒飯的份量比想像中少，炒飯ok不過鰻魚就比較少。大板燒醬油豚肉炒麵幾好食，炒得夠香兼且唔算多油。。細size的蟹籽沙律的份量就比想像之中來得大份，$38的價錢都幾抵，味道都係咁啦，蟹籽蟹柳絲青瓜絲再加埋沙律醬嘅味道囉。燒鯖魚都算大件，以$58一份而言，佢嘅份量係出面嘅1.5倍左右啦。呢間餐廳個日式煎餃子好難得真係煎唔係炸，味道無意見因為都係交貨黎嘅預先包裝貨，只係煎返熱比你食。最後一提，呢間餐廳嘅侍應有好大進步空間，唔係話佢哋偷懶唔落力，只係以我嘅觀察有幾個都好似遊緊魂咁，同埋鍾意推埋一齊做相同嘅工作，有啲亂，希望佢哋會越做越好啦。