江浙滬 (堪富利士道) (已結業)

講起食晏，無論在商業心臟嘅中環，又或者旅遊中心嘅尖沙咀，都係一件煩惱的事情。因為食晏時間，到處人頭湧湧，人山人海，搵位難，等位苦。今日下午在尖東食晏，好彩有熟人指路，去了一個不用等位，環境又不錯，經濟抵食既食肆午膳，食肆叫江浙滬。江浙滬在富利士道11號，是樓上鋪，佔2樓及3樓兩層，主打江南美食，內裡地方寬敞，佈置典雅，環境舒適。午市套餐相當經濟抵食，套餐附送豆漿及小食一客，價錢都是幾十蚊，環境舒適過好多連鎖快餐店，但價錢就相差無幾。坐下叫了套餐紅燒鱸魚飯和川式擔擔麵，另加甜品薑茶湯圓。紅燒鱸魚飯，鱸魚皮口感煙韌，魚肉香滑鮮甜，入口啖啖肉，配料還有冬菇、筍和肉片等。川式擔擔麵，碗擔擔麵無論賣相和色澤都很對版，湯底入口濃而不稠，帶微微辣。麵條柔韌有嚼勁，而且食落仲有少許花生香，配合濃濃湯汁，開胃好味。附送小食野菌拌金針菇和上海糯米燒賣，水準都唔錯。豆漿甜度適中，豆味濃郁。薑茶湯圓，湯圓一客只有兩粒，分量比預期少，不過味道唔錯，外皮薄身又滑溜，中間芝麻餡呈半流心，香濃油潤，配上辣度強勁的薑湯，絕對值得推介。江浙滬還有多款單點小菜、涼菜、小食、甜品等江南美食，有空值得再來試試。