煲仔榮記 (已結業)

久仰慈雲山榮記嘅沙嗲牛肉煲仔麵，可惜一直冇機會試，直到舊年旺角開咗間煲仔榮記，終於有機會朝聖。呢間店入面嘅裝修以本土情懷為主，好特別。叫咗個沙嗲牛肉煲仔沾麵，龍蝦湯底，盛惠 78 蚊，都幾貴😐。Menu 上面 emphasize 重口味，果然一啲都冇花假，雖然預咗沾麵個湯底會比較濃，但係真係比想像中鹹好多😂，幾乎蓋過哂龍蝦味，而且沙嗲嘅甜味同花生味都稍為弱，只能講唔係我最鍾意嘅沙嗲口味。至於牛肉同公仔麵由於冇畀湯浸住，食嘅時候彈牙唔腍，口感唔錯。最正嘅反而係調味料，特別係蝦油，非常鮮味，加落公仔麵食，超正😍，搞到我都差啲想買返樽返屋企。