三田製麵所 (K11購物藝術館) (裝修中)

成日都好想試喺K11呢間三田製麵所，今日終於食到。以拉麵店嚟講，呢間算係幾大規模，店內空間感十足。晚市都可以選擇優惠套餐，有齊拉麵、小食同飲品。嚟呢度就係想試佢嘅沾麵，款式相當多，最後我就揀咗濃香豚骨魚介沾麵。沾麵嘅麵條比較粗身，麵可以選擇冷熱，凍嘅麵比較爽口，熱嘅麵就比較腍身。 沾麵嘅湯非常濃郁，所以可以牢牢地掛住喺麵上面。食晒所有麵之後，可以請店員加湯，就變成一碗濃濃嘅湯。另外仲揀咗三田豚骨拉麵，佢嘅豬骨湯非常濃郁。湯麵嘅麵就比沾麵嘅麵較為幼細，用嚟配湯麵就更合適。拉麵套餐可以優惠價揀小食，我哋就揀咗煎餃子，入面都幾多肉汁。自家製炸雞嘅肉質就夠晒嫩滑，外面炸得香脆而唔油膩，味道不錯。加埋罐汽水就係完美嘅一餐。