Sawadee Chef

營業中

休息中

實在太耐無出國喇，好在喺香港容易食到唔同國家嘅菜式，香港人鍾意食泰國菜，因為五味俱全亦都充滿特色，今次就去咗奧海城新開嘅Sawadee Chef試吓。【牛肋條】啱啱燒出嚟，上枱仲見到肉汁滲緊出嚟，咬落去勁juicy，而且肉質軟腍肉味豐富，絕對係靚牛嚟。【松板肉】燒嘅火喉啱啱好，唔會太乾身，蘸少少泰式辣醬酸酸辣辣，刺激味蕾，食完一塊停唔到口～【鹽焗羅非魚】上枱時成條魚係被鹽包住晒，店員先將鹽層敲碎，再剪開牛油紙就見到條魚啦。魚嘅外皮鋪咗啲薑片，加上放入魚身嘅香茅，除咗起到辟腥嘅作用亦令味道更加泰式；想試唔同口味可以蘸泰式青醬，辣辣哋但唔會掩蓋鮮味。【虎蝦炒金邊粉】金邊粉被金黃色嘅網狀蛋包包住，上面係兩隻粉嫩虎蝦，旁邊就有花生碎、辣粉同青檬。擺碟咁有心思，相機當然要食先～虎蝦爽彈鮮美，金邊粉炒得有風味，加少少辣粉同花生碎更惹味更有口感。【芒果糯米飯】泰式甜品必食之選，芒果肉新鮮香甜，糯米飯口感軟糯。食完滿滿幸福感覺，好滿足呀！加埋兩杯冰凍飲品，好chill呀！餐廳嘅泰式裝潢好有高級感，加上落地玻璃採光十足，而咁啱出面有幾棵貎似椰樹嘅棕櫚樹，望出去椰林樹影咁，好似去咗泰國一樣～令人非常愜意。