Lemongrass (已結業)

收工同女友去左行街，行左陣肚餓所以去左搵食～經過見到呢間食泰國菜，價錢又唔貴，所以揀左呢到。坐左喺水吧附近，上面黑板寫左有咩野飲。($68兩杯)我地兩杯就揀左椰子同藍蝶花椰果冰，其實我唔知藍蝶花係咩味，剩係知飲落杯青檸底既野飲到有陣清香味，令到杯野無咁重甜同酸味。串燒半打，要左3牛3雞，串燒其實無太大特別，無燒到乾。而佢兜沙嗲醬好好味，如果再多啲醬狠不得拎黎撈飯。泰式蔗蝦，熱辣辣出黎食落好香口，無一般舖頭食開咁實，好明顯係人手造的。香芒軟殼蟹米紙卷，米紙包住粉絲、蘿蔔絲同青瓜絲，芒果唔多只係拎黎吊味，令到成碟野清新好多，亦減低左軟殼蟹既油膩感覺。青咖哩雞，用椰汁煮既關係所以好香，味道唔錯，不過就稍為偏辣。芒果糯米飯，食泰國菜無人唔識既甜品，白糯米比較香同軟身，黑糯米就比較煙韌，芒果超甜。