翡翠拉麵小籠包 (已結業)

海港城有間新加坡連鎖餐廳「翡翠拉麵小籠包」專門食上海菜式，價錢都唔算太貴，裝潢都唔錯，幾舒適。我地幾個人點選左：「花雕醉雞」、「上海小籠包1籠4件」、「上海生煎包」、「開洋蔥油乾撈拉麵」、「清燉雞湯拉麵」、「雪菜蝦仁炒飯」、「豆沙鍋餅」。「花雕醉雞$65」好香花雕酒味，啲雞件都好滑，只係份量比較少。「上海小籠包$38/4件」皮唔太軟唔太靭，值得一讚係好夠熱，皮內餡料連湯好鮮甜。「上海生煎包$39」表皮煎得剛剛好，食落好香口，肉質好鮮。「開洋蔥油乾撈拉麵$48」好開胃既一道菜，肉碎粒同蝦乾都好惹味，跟麵配上清湯一碗，可以伴麵撈湯，推薦！「清燉雞湯拉麵$48」拉麵份量略細碗，雞肉可以燉湯後變得無咁滑，雞湯都幾入味。「雪菜蝦仁炒飯$92」雪菜味好香，蝦仁都唔少，整個飯都炒得乾身，唔太油，唔太鹹，推薦點選呢個炒飯。「豆沙鍋餅$48」好香好脆身，鍋餅中間豆沙有好多，唔會太甜，好好食。p.s.建議預先安排「叫起」，咁就可以食完主食先食甜點。「茗茶$8/位」