貴州熙月羊肉粉館

營業中

休息中

喺深水埗行完街，行落去太子就係為咗試呢一間羊肉米線。間舖都幾吊腳，喺深水埗同太子之間。不過太為食就要行下。入到嚟之前嗰啲客已經離開咗枱面嘅嘢未收，剩係得我一個人。話晒試新嘢，有啲保留好啲，所以淨係嗌咗個羊肉米線，一份糍粑同埋黑豆漿。老闆幾好問我啲豆漿要唔要甜。走甜當然好啦，飲落去同屋企自己用黑豆打嘅一模一樣，都幾濃郁唔會太稀。碗羊肉粉上場啦，試一試啖湯先。淡，好淡。跟住老闆娘叫我搞一搞個底先至再食。搞完都係淡。不過見佢啲玻璃門上邊都貼住唔夠咪可以自己加鹽，湯頭做得唔好，真係嘥咗一碗粉。其實啲米線好好食粗粗地又彈牙又夠滑，但係個湯底真係敗筆。啲羊肉片食落去感覺就有少少怪，好似食緊金華火腿片咁。當然唔會好似火腿咁鹹，不過個質感就係好似金華火腿。食到大半個糍粑終於到。新鮮整真係好軟糯，但係啲紅糖原來唔係喺個糍粑裡面，只係喺面嗰度加少少紅糖漿，不過都好好食。希望佢可以喺個湯底嗰度下多啲功夫就好啦。