鍋居火鍋專門店 (已結業)

自從限聚令以黎，好耐都未同朋友出街打邊爐啦。今日心思思，同朋友約左深水埗鍋居放縱一下。椰青礦泉水走地雞鍋。非常獨特，有店員即席開鍋，先𠝹開椰青，再混合礦泉水，最後雞落鍋，雞件浮起，滾出黎係金黃色。走地雞好處係脂肪唔多，肉質鮮嫩，令整個鍋底好清，冇乜油。野生竹笙。打邊爐必備之物，無論滾幾耐都爽口彈牙，吸盡湯汁精華，味道濃郁，愈食愈好味。蟶子王。新鮮又大隻，店員怕我地唔識整會整到太熟，專程幫我地焯埋，勁有心！蟶子夾起黎入口啖啖肉，齒頰留香。鍋居至尊手切肥牛。肥牛係打邊爐必備之一，手切肥牛有順紋理而切，更好地保留牛肉質感同口感，而且留有一定厚度，可以鎖住火鍋湯汁，滋味！經過一輪大戰，飲番杯自製蘋果雪梨茶潤一潤喉嚨，既可以冇咁熱氣，又可以甜一甜中和一下。今次深水埗鍋居有驚喜，價錢合理坐得舒適，而且食材都算靚，下次會再約朋友黎聚，推介！