一寿司 (已結業)

一壽司搬咗真係唔知, 太耐無去, 係朋友話要去食壽司先知。天氣咁熱, 見到餐牌, 點d清新之選食吓, 就點咗香芒甜蝦壽司及梅醬貝片。香芒甜蝦賣相討好, 睇落都清新, 食落去芒果加甜蝦加青瓜再加沙律醬, 真係似芒果沙律加飯, 芒果夠甜, 意料之外, 因為好多用芒果做嘅菜色都係酸酸地, 唔係咁鍾意, 所以就覺得呢個壽司特別好食。試下個梅醬配貝片會唔會開胃d, 塊貝片好爽口, 夠新鮮, 加梅醬酸咪咪, 都算開胃, 夏日不錯之選。兩款蟹嘅壽司, 分別係蟹膏甜蝦及蟹膏蟹肉壽司, 蟹膏配甜蝦同配蟹肉有唔同食法, 雖然蟹膏嘅顏色望落去就麻麻地, 但食落又好香蟹膏味, 我就覺得配蟹肉好似夾d, 蟹肉好鮮味, 成為我至愛之選之一。唔係咁多人會食左口魚邊壽司, 我地都無咩食過, 但今次就試下, 發覺左口魚邊好爽口, 肉質有口感, 雖然唔係肥美的感覺, 清淡d, 無咁溜。帆立貝三食分別有汁煮帆立貝、柚子帆立貝及火炙帆立貝，我只係食咗汁煮及柚子，我比較喜歡柚子帆立貝, 都係果句, 夠清新, 都係啱夏季食, 汁煮其實都好食, 味道唔太濃, 無影響帆立貝嘅鮮味, 都值得一食。