洞庭樓 (已結業)

十多年來太古城三期的食店從中泰海鮮酒家散班後變成大路貨翠晶軒，以後鐘菜銳意搞高檔路線不果，再由美心集團做超豪裝修搞間洞庭樓。今次裝修將個接待處大大個擺到正中，派頭威過隔離潮州野，入面落地玻璃加個柵，睇街睇埋窗框，又地毬又地板分隔出幾個區間。連去廁所條路、牆壁都鋪過哂，洗唔洗呀！真係十年人事幾番裝修新，以前舊址舊店食到變老友的伙計們好多都出頭發達收山矣。是晚也，習慣性地浦浦下盪到呢個地埗，洞庭開張囉。以前食過中環那間感覺不差，又幫趁下先。由於我生飛滋，點的菜都不辣。兩個人點的一羹兩菜，份量足夠有餘。豌豆海鮮羹 - 四人份量，熱度足夠，碗豆茸加上幾粒荷蘭豆，豆味濃而清新。可惜碗豆茸未能攪勻，上碗時還有粉團。咸蛋炒蝦球 - 去殼雪藏蝦加上厚厚鹹蛋炸粉，唉。富貴牛腩 - 出水牛腩舖面，下面是未晾乾水的灼熟黃芽白，牛腩片淋上紅色的蕃茄醬，很有塔巴斯科辣椒味道。賣相不像富貴，倒疑似洞庭水景。值得一讚是茶味雖淡，卻無太古特有的水喉味。重可以用運通白金半價，正呀！