豆美味豆花團

營業中

休息中

今日一早起身去上水，專登走去大水管打卡😆出到黎經過哩間豆花店，之前已經聽過佢十幾蚊就可以任食，不過而家因為疫情關係所以暫時取消咗，好在我哋唔係好餓，所以只係入去試左碗豆腐花同埋豆漿。裏面嘅環境相當闊落，除咗出名嘅豆腐花同豆漿之外，仲有其他小食，最特別嘅係竟然見到佢有自助購票機。我哋喺右邊收銀嘅地方買完野之後，就喺左邊既位置拎嘢食，記得要預先霸左位先好去買嘢食啊！🎈豆腐花（熱）我哋行完大水管出黎係12點幾，冇諗過咁早已經賣晒凍嘅豆腐花，所以唯有要咗一碗熱嘅。佢係自助形式加薑糖漿同埋黃糖嘅，可以自己決定落幾多。豆腐花非常滑溜，而且大大碗，唔會好似出面咁食到石膏粉味。🎈低糖豆漿雖然話就話低糖，但係其實都幾甜，而味道就同出面買嘅豆漿差唔多。如果大家咁啱過嚟郊遊會經過嘅話，平平哋都可以入去試吓。