黑布小巷

營業中

休息中

從前蒲葵廣，經常幫襯黑布小巷，今日就去咗億利搵返令人懷念嘅味道。一到達樓層，就見到小小嘅人龍，好彩唔算等太耐就有位，即刻坐低叫晒所有我最想食嘅嘢。台式嘅蛋餅真係好好味，今次就揀咗芝士火腿肉鬆蛋餅，雖然材料簡單，但係一拍即合。另外就揀咗慢烤雞腿芝士蛋吐司，餐廳仲會提供手套，可以放心大啖大啖咁食。厚厚嘅雞腿配上濃郁嘅芝士，麵包烘焙得剛剛好，每人半份開心share，就可以試多幾款菜式。手工滷肉蝦卷便當份量相當多，下次應該要叫小飯。滷肉肥瘦適中，煮得夠腍，充滿肉汁，撈飯一流。蝦卷總共有三條，滿滿嘅蝦肉非常彈牙。個人認為台式嘅花枝丸完勝港式墨魚丸，所以我每次必食，今次選擇咗淮鹽味，其實唔點都已經咁好食。呢度嘅台式飲品都係佢哋自家製，沿用台灣出品嘅材料炮製，當然要試番2杯。桂花雪梨羅漢果茶味道清甜，飲落夠晒滋陰。古早味冬瓜茶係我去台灣必飲嘅台式飲品，而呢度嘅冬瓜茶絕對有台灣嘅水準。最後嚟個甜品，芋頭椰汁三色芋圓係佢哋嘅必點招牌菜式，芋圓超大粒，又夠Q彈，配合椰汁味道都非常夾。