新泰東南亞餐廳 (興旺閣)

營業中

休息中

灣仔有一間都幾大型嘅泰國菜餐廳，就係呢間佔地三層嘅新泰東南亞餐廳。我哋二話不說就落單，泰式炸蝦餅每次都係必點菜式，切開咗嘅蝦餅總共有八件，每件都漲卜卜夠厚身。蝦餅炸得香口又夠乾身，彈牙得嚟又有蝦味，點埋泰式甜辣醬簡直就係絕配。馬拉盞炒通菜都幾大碟，通菜新鮮夠爽口，馬拉盞充滿鹹香，又唔會過辣。我仲叫咗杯芒果沙冰，襯返泰國菜式，一路食一路覺得透心涼。甜品當然要叫芒果糯米飯。佢嘅芒果淨係睇色澤都知靚嘢，又腍又甜又香。糯米飯就用上黑白糯米，配埋海量嘅椰漿，真係冇得頂。