蘭度小籠包 (已結業)

女朋友超鍾意食上海菜，今日經過灣仔蘭杜街時剛好發現一間新開嘅上海餐廳，我同女友決定入去試試。餐廳乾淨企理，裝潢普普通通，不過我覺得論上海餐廳，食物質素先係最重要，環境裝潢係其次。餐牌上嘅食物分為五大類，包括冷盤、湯類、小菜、飯麵同甜品。- 嫩雞燴麵麵條有少少煙韌，浸左係湯好耐亦唔會變得太爛，另外有大量小棠菜同雞肉碎，湯底清甜，完全無味精。- 上海炒年糕年糕加上娃娃菜、白菜、雞絲同冬菇片一齊炒，年糕有嚼勁唔黏牙，不過有少少油膩感，而且無乜味道，反而白菜、雞絲同娃娃菜索曬汁幾惹味。餐廳額外提供豆瓣醬，年糕味道唔會太寡。- 小籠包（四隻）餐廳名字叫蘭度小籠包，難道小籠包真係咁出色？從外型上看，四件小籠包size非常接近，外皮薄身唔易穿，湯汁香濃。肉餡份量比較細，所以望落小籠包比較的骰，但都符合「皮薄餡靚」既標準。- 紅燒獅子頭獅子頭肉質有啲鬆散，不過味道不錯，下飯一流。配料仲有荀同娃娃菜，增添爽脆口感。冇話其中一款食物特別深刻，但食物水準中等以上，小籠包可以encore!