陶園燒臘飯店 (已結業)

爸爸生日，總唔可以兩手空空返屋企食飯，咁啱經過呢間燒味店，知道爸爸最鍾意食燒味，就一於斬料返去加餸啦。餐廳裝潢好有傳統燒臘店感覺，櫥窗掛住燒鵝、燒排骨、鹵水墨魚等等，有好多選擇，門口仲有一隻造型非常特別嘅吹氣燒鵝公仔，真係離遠就望到。餐廳標榜荔枝柴燒鵝，知道爸爸最喜歡食燒鵝，一於斬返份例牌，例牌分量都幾多，外皮色澤均勻，有淡淡荔枝柴香，食落皮脆肉嫩，燒鵝脾肥美多汁，其他位亦肥瘦適中，加埋餐廳提供嘅燒鵝汁，真係非常好味，爸爸都讚不絕口。另外食燒味又點可以無叉燒？我地揀左半肥瘦叉燒，色澤好靚，火喉啱啱好，蜜汁味香濃，食落好多肉汁，肉質唔會太韌，好好味。喺等外賣嘅時候，都見到不停有人買燒腩仔同燒排骨，有機會下次一定要試下。