蚊蚊豬老火鍋 (已結業)

今日同屋企人去左深水埗食「蚊蚊豬・老火鍋」，試咗晚市極品放題，只係$298一個人就可以食火鍋同刺身放題，仲可以任轉湯底、飲品任飲，淨係價錢已經相當吸引！🥘首先叫咗夏季期間限定嘅海虎蝦紅酒燴牛尾鍋，湯底好有驚喜，蕃茄味道濃郁，紅酒味唔重，唔飲酒嘅朋友都可以放心食。另外，牛尾相當入味，虎蝦按人頭數，勁大隻，夠晒鮮甜彈牙。🍲之後我哋轉咗藥膳鮮雞鍋，雞件同藥材都好足料，湯底味道鮮美，又夠滋補。強烈推薦大家叫炸魚皮食，浸湯食真係一流！🥩火鍋配料方面，因為我同家人都係食肉獸，所以我哋主攻牛肉，叫咗封門柳、牛肩肉同牛舌芯等等，牛肉質素非常高，牛味十足，同兩種湯底都好夾，我哋三個人食咗一大碟！🦑刺身方面，我哋叫咗三文魚、甜蝦、墨魚同八爪魚，雖然種類唔算多，但係全部都好新鮮，過下口癮唔錯！😋整體嚟講，餐廳員工服務態度良好、環境舒適、座位闊落、食完唔會成身油煙味，而且食物出色，價錢又抵，我哋一定會再Encore！下次要試烤魚火鍋湯底！