倫哥尚品火鍋私房菜 (已結業)

朋友食過呢一間私房菜之後極力推薦，所以搵咗一晚特登book枱去食。一上到去已經聞到大大陣火鍋味。我哋揀咗個海鮮餐，咁就會有刺身加啲海鮮火鍋配料。一開始上咗個刺身先，啲刺身非常新鮮，同平時放題嗰啲冇得比，佢有三文魚，帶子，蝦。之後就有有個雞煲，我哋揀咗小辣，雞煲要等8分鐘，每2分鐘搞一搞，之後就食得。雞煲啲雞非常入味，佢嘅醬汁小辣來講唔算辣，8分鐘啱啱好，啲雞夠亂嫩，醬汁有層次。佢亦都會有一碟豬皮同魷魚俾我哋，當個雞煲可以食嘅時候就加落去，過2分鐘就夾得，又係同啲醬汁非常夾。食完雞煲之後佢就會成個鍋換，我哋就揀咗蟹鍋。火鍋配料方面有牛頸脊，仲有啲佢哋出名嘅手打丸同埋雲吞水餃，牛頸脊要再叫嘅話就要另外收錢，但係啲火鍋配料係免費嘅。牛頸脊比普通肥牛嘅脂肪分布少， 淥一淥就食得，有牛味之餘亦都唔會太肥，入到口非常香軟。叫得海鮮餐當然仲有海鮮，有脆鯇魚同埋鮑魚，聖子，蝦，樣樣都非常新鮮。值得一提嘅係佢個魚皮同響鈴，魚皮味道夠濃，就算浸左湯之後都食到佢陣味， 而響鈴就係新鮮即炸非常脆。