雲來軒 (已結業)

是晚同一眾好友相聚，朋友選左呢間新派粵菜，雖見價錢都唔太平，但大家都躍躍欲試。 朋友已訂枱，所以去到都唔使等。對唔熟尖沙咀嘅朋友嚟講，酒家位置係有少少難搵嘅。上到酒家，其實地方比較細，枱與枱之間位唔多，但都光鮮企理嘅。 我地坐低後，因未齊人，都傾一陣偈先點菜，侍應都無催我地。 上菜時間一般正常啦，侍應態度都良好嘅。我地都點左8碟餸，真係有讚有彈。其中最掂嘅係脆皮牛仔腩，肉嫩唔黏牙，仲有脆脆嘅外皮，正!  話梅雞都ok嘅。 而最唔掂嘅，我覺得係星洲炒米囉，茶記果D都炒得香過佢。 當然雜菜煲都係勁普通，可以唔使叫。 而陳皮骨嘅份量就少得可憐，真係預你一人食一粒，同價錢唔成比例啦。