莆田 (美麗華廣場2期) (已結業)

平時都比較少會去食中餐，頂多可能食下上海菜，今次就全因爲出左呢個蟶子嘅推廣，就特意黎食左餐福建菜。冰浸苦瓜平時食苦瓜多數都係一嚿嚿咁食，今次就試下佢呢個號稱只有2 mm薄嘅苦瓜。真係正如餐牌所講，食落更似水果，入口有清甜感覺，之後再有回甘嘅感覺，口感清新。莆田扁肉湯紫菜湯湯底入面加入咗類似魚皮餃嘅餃子， 飲落非常重肉味，而餃子嘅肉質亦好有口感。哆頭蟶炒蛋蟶子嘅份量非常多好，幾乎每啖都食到。蛋唔會太鹹亦唔會太濃味，唔會蓋過蟶子嘅鮮味。鐵板鹽焗蟶子賣相不錯，而且上枱時溫度十足。本來以為鹽焗蟶子會好似鹽焗雞咁比較鹹，但實際上卻唔會太食到鹹味，而且以鹽焗方式處理更大能突出蟶子嘅原味。莆田荔枝肉酸酸甜甜食落有啲似咕嚕肉，食落有少少荔枝嘅香味，而且真係有荔枝喺入面。興化炒米粉望落平凡嘅米粉，原來入面非常多料。 除咗有蝦同蜆肉，仲有各式菇同埋蔬菜，食落爽口之餘亦味道又唔會太寡。