Goobne Chicken (瓊華中心)

營業中

休息中

旺角瓊華中心樓上嘅食肆都好高質，所以我都鍾意同朋友嚟呢度搵食，今日我哋就揀咗位於15樓嘅Goobne。韓國炸雞出名唔使講，但呢度係以烘烤方法來烹調雞件，所以比平時食開嘅炸雞更健康，見到餐牌嘅第一頁，我就已經決定咗揀乜嘢菜式。韓式烤雞通常都比較大份量，好彩呢度有得揀half & half，可以試兩種唔同口味，3-4人嚟食都絕對夠食。而我哋就揀咗Goobne原味烤雞+蜜糖香滑烤雞，每份烤雞仲會配埋醃蘿蔔同兩款醬料。蜜糖香滑烤雞係用蜜糖芥茉汁烤焗，每件雞嘅外層都沾滿咗蜜糖芥茉，甜甜地幾好味。而Goobne原味烤雞就係將醃製好嘅雞件直接烤焗，雖然冇加任何嘅醬料，但有時原汁原味其實更好食。只係食雞又好似dry咗啲，所以揀咗個鐵板芝士泡菜炒飯，炒飯入面有好多泡菜，而且粒粒飯都沾滿泡菜嘅汁，酸酸辣辣又爽口非常醒胃。而旁邊嘅芝士份量比我想像中多好多，而且仲有拉絲嘅效果，配埋隻靚靚太陽蛋，真係食到舔舔脷。