麵屋常勝

營業中

休息中

放工約咗朋友喺觀塘做瑜伽，打算喺附近快脆食少少嘢。行過東廣場見到新開咗間拉麵店，主打係無味精湯拉麵，於是就一齊試一試佢😙因為朋友唔鍾意食蝦湯拉麵，於是佢叫咗人起雞白湯叉燒拉麵，我就食咗招牌嘅濃蝦湯，加$22可以有小食同埋送冷泡茶。冷泡茶嘅份量都唔細，應該有大概400 mL，我哋跟餐嗌咗章魚小丸子同埋炸雞軟骨，因為朋友好想食芝麻雞翼同蟹肉薯餅，所以我哋都另外再加咗。小食上到枱都非常熱，雞軟骨個調味啱啱好唔會太鹹，個人最鍾意都係章魚小丸子，雖然睇落細細粒，但係入邊都有一粒足料嘅八爪魚。小食嚟晒等咗一陣拉麵先上枱，我先試咗朋友嘅雞白湯，飲落去唔會太鹹，係啱啱好嘅雞湯味，拉麵配有一粒粒糖心蛋同兩塊叉燒，糖心蛋煮得啱啱好唔會過熟，叉燒亦都唔會太肥膩，整體成碗拉麵望落去唔會太多油。跟住講吓餐廳人氣嘅濃蝦湯，配料基本上同雞白湯拉麵一樣，但係個湯飲落去feel到勁足料，食到海鮮嘅鹹香同感覺上真係冇落味精，食完唔會勁口渴。