點煲 (星輝台智星閣)

營業中

休息中

午飯諗緊食中餐定西餐，諗住天氣開始凍，最後揀咗依間相對叫新開嘅煲仔飯。入到嚟無咩招呼，四個人揀咗三個個煲仔飯（窩蛋牛，臘腸雞同埋咸魚肉餅），再加兩款點心（炸蝦卷同臘腸卷）。點心先上。熱辣辣，蝦卷十分脆。臘腸卷都好食，所以之後叫多籠。煲仔飯三款都唔錯，有小朋友就唔好叫咸魚肉餅，因咸魚多骨。味道唔錯，啲料都多同ok，最正係佢啲飯焦好容易剷起，所以食每啖飯都有脆卜卜嘅飯焦，十分正。另外，佢除咗豉油，仲有豬油俾你自己加，搞啲成煲飯好香好滑。（因上星期去過大埔一間有名嘅煲仔飯，太古點煲好似好食好多）食食下遇到個好健談嘅伙記（潘先生），佢十分勤快，又同我哋有傾有講，見我連最後尾嘅飯焦都唔放過時，仲主動用秘方教我哋點樣用少少力就剷起啲飯焦（加少少茶，浸一浸，就唔駛用力都搞掂）。都係嗰句，食物質素固然重要，但服務更加緊要，所以今日嘅用餐體驗真係好開心！照例無相，唔好意思。