響葫蘆 燒物 . 居酒屋 (已結業)

今日約左朋友係尖沙咀食晚飯，大家對食咩晚餐都冇乜頭緒，但諗諗下大家好耐都冇食過放題。好彩walk-in 都仲有位，就一於試下佢啦。入到去坐低，見到大概地方可以坐到30人到，仲有個露台！花之戀壽司個三文魚好新鮮同肥美，食完忍唔住再叫多一客食！蟹籽沙律上面既蟹籽雖然少左d，但個青瓜絲非常爽脆同鮮甜,仲要都係用左BB仔沙律醬即時加左分！仲有我好想食既海膽手卷，仲要係數量唔多，一於叫左兩個先！食落都算好新鮮。日式放題就梗係唔少得刺身，我地叫左北寄貝，帶子，黃金魷魚，三文魚，八爪魚，芥末爪魚，見到人地寫都話呢間刺身都話好新鮮，我今晚食左都真係全部好新鮮。我地仲試左芝麻雞翼，都燒得外脆內軟同外面既芝麻好香口，個吉列炸蠔，外面炸得好脆雖然隻蠔唔算好大隻，但蠔既味道好出色，好鮮味。而汁燒一品牛扒，牛扒本身肉質已好靚，醬汁都好味，我自己覺得個汁可以少d仲正。之後仲試左大蝦，南瓜，蕃薯天婦羅，蝦都好大隻，南瓜同蕃薯都係來自日本，所以幾樣都好好味。而甜品我地叫左籠仔蒸日本蕃薯仔，呢個食燒就食得多，就未食過蒸，所以叫唻試下，我自己覺得仲好味過用唻燒, 真係好香既蕃薯味。食完埋單之後仲送左個雪糕糯米糍，正呀！