鼎尚棋哥燒鵝湯館 (已結業)

今日放假，就同朋友一齊遠離繁囂，嚟到戲曲中心感受一下文化氣息。 呢度除咗有粵曲聽，有藝術紀念品賣，仲有幾間食肆，當中最出名嘅梗係鼎爺有份開嘅呢間啦。 有鼎爺嘅滋味燉湯，亦有棋哥嘅惹味荔枝柴燒鵝。裝潢好懷舊，門口已經有一道N年前feel嘅鐵閘。餐牌簡潔，餐紙有特色。先講燉湯，係鼎爺嘅私家配方，用料十足㗎。 【椰皇燉嫩雞】用咗原個椰皇去燉，一飲落去真係好清甜。 啖啖都係椰皇水同嫩雞肉，好好飲，好潤好清甜。 【杏汁花膠燉白肺湯】有唔少豬肺件，用料十足。想除左堂食仲可以外賣個湯返屋企慢慢嘆，可以用有個設計十分方便嘅外賣湯杯，有手抽，仲好似咖啡杯咁可以隨手飲用。 燒味叫左三款。【桂香切雞】啖啖肉，少脂肪，肉質彈牙夠嫩夠滑！仲好香雞味。【脆皮燒腩仔】外皮超鬆化，下面半肥瘦，瘦肉肥肉一層層相隔。 最特色係【荔枝柴燒鵝】唔會太肥，用荔枝柴嚟燒煙燻，果然多一份香味，比出面嘅燒臘店普通燒鵝好食好多。不得不提呢度嘅瀨粉，爽口彈牙，正！【郊外油菜】夠鮮嫩。仲叫左【港式奶茶】茶味奶味並重，夠晒香夠晒滑，仲喺鼎爺私房菜製造，即刻感覺高檔好多。