天鴻燒鵝飯店

營業中

休息中

燒鵝瀨粉&燒鵝飯上月中旬工作完畢後，路經元朗去食我最鍾意嘅燒鵝瀨粉，天鴻位處元朗區，屬於比較出名嘅燒鵝燒臘店家，雖然位處舊區環境比較差，而且零裝修，屬於舊式嘅燒臘店，但係為咗食燒鵝唯有將就一下。店內環境及餐具碗筷清潔一般，但仍然可以接受，叫店員攞杯水自己洗下筷子匙羹還算可以。落單一碗燒鵝瀨粉同一碗燒鵝飯再加多兩杯凍檸檬茶收$134。燒鵝瀨粉比嘅係燒鵝下裝部位，顏色香味都屬於水準之作，皮及油脂肥美而肉質軟嫩，配上醃料香味濃郁，入口𡁻兩𡁻滿嘴油膩同皮肉組成爆炸混合體，天作之合問你點頂，又係另外一種美食感受。瀨粉軟滑又有咬口感，而湯汁比較淡味，其實燒臘店斬剩咁多下欄，應該放埋落去熬湯底，一定會增加整體表現。至於另外一碗燒鵝飯情況啱啱好反轉，燒鵝係上半部，鵝皮微燶發黑，而肉質就較為煙靭嚡口，同樣一齊落order，水準落差大不同。至於凍檸檬茶嘅水準就可以唔使再提，似飲杯有顏色嘅檸檬冰水，今時今日真係好難飲到一杯像樣嘅檸檬茶。