姚姚酸菜魚 (青衣城1)

營業中

休息中

呢間位於青衣青敬路31-33號青衣城1地下G01號舖噶姚姚酸菜魚，裝修風格特別，大多數都係用咗湖水綠嘅顏色，視覺上都幾舒服，入面嘅位置都幾闊，坐得舒服。坐低倒咗兩杯茶，估唔到佢嘅茶倒出嚟噶時候會有陣椰香奶味。之後開始掃Q R code落單。蒜泥白肉，呢個比起出面平時食嘅蒜泥白肉，製作多咗啲心思，中間卷住萵筍絲，加上調配好的醬汁，食落去唔會太膩。紫蘇牛蛙，牛蛙處理得乾淨，外面一層過咗薄薄地嘅粉，走咗油，鎖住咗D肉汁，再配合啲蔥，辣椒一齊爆香，一啖落去，外脆內嫩，又有淡淡紫蘇香，辣度適中，牛蛙份量都幾多，值得一食。熗炒手撕蓮白菜,有鑊氣，因為叫咗唔辣，食到菜嘅甜，加上蔥同蒜一齊炒，好惹味，好適合配飯。講到白飯，呢間嘅白飯用嘅係特級米，侍應將飯放喺枱面，就聞到好香嘅米飯味，可以睇得出呢間對米飯都有返一定嘅要求。多多桃膠椰奶，桃膠處理得乾淨，一杯份量滿滿，同椰奶都幾配。新鮮水果烏龍茶，茶香加上百香果香橙，清新之餘又可以解油膩。唔錯。呢間姚姚酸菜魚雖然主打喺食酸菜魚，不過佢嘅牛蛙都值得一試。