逸東軒

好出名嘅中菜餐廳，早咗兩個月book先book到星期五晚市，未開始食已經好期待！一嚟即刻叫啲前菜先，話梅車厘茄好好味，酸酸甜甜，話梅襯托下顯得車厘茄更加甜。反而金莎豆腐一般，椒鹽味太重，一度懷疑佢上錯咗椒鹽豆腐燒味揀咗個叉燒，見好多人推介，但我覺得一般，水準略高於一般燒味舖，但唔夠香亦都唔夠鬆軟。片皮鴨就好出色，鴨皮香得嚟唔肥膩，餅皮超薄，兩食先$598真係物超所值！蟶子好新鮮，可惜我食嗰隻略嫌過熟，有啲難𡁻。芝士蟹蓋都好好食，蟹味同芝士味都好出，食晒成個都唔覺得膩。杏汁豬肺湯就正常，但$180一位就貴咗少少。好少食蝦醬生菜呢個組合，幾香口，唔算太油。最後嚟一個甜品收尾，都係好食嘅，糖水舖水準。平日晚市仲有全單75折，去過好多酒店中餐優惠期間都會略降水準，逸東軒係維持水準，難怪booking咁full。