黑木亭居酒屋 (金馬倫道)

上餐廳前既樓梯都有日本居酒屋風格，上到去坐，啲位都闊落，坐得舒服。揀左啲特色野食。火龍果佛手柑熊茶，藍蝶花佛手柑熊茶都好大杯，有隻熊仔做裝飾，仲有幾多朵玫瑰花，建議飲咗第一二啖先好用飲管，如果唔係會滿晒出嚟， 配有檸檬，檸茶中帶點火龍果/蝶豆花嘅味道。三味鐵板A5和牛鵝肝，石板上菜，一到枱就聞到陣陣香味，熱辣辣超新鮮，配有明太子香蔥豉油，佢連幾塊麵包用嚟配鵝肝食，鵝肝好腍，無腥味，入口即溶，仲配有洋蔥，連卜卜脆嘅麵包，成個口感好好。大蔥蒜蓉和牛，配明太子香蔥豉油，豉油入邊有帶點酸味，剛好中和返和牛嘅油。厚切A5和牛，做到半生熟，外熟內生，好Juicy口感好好，夠腍冇筋。黑糖啤酒拉麵2.0 ，以啤酒杯上，杯面係奶蓋，底下係冷面，味道似係烏龍茶奶蓋拉麵，味道出奇地夾，配埋芥辣香蔥同紫菜，好有新鮮感嘅冷麵，食落唔會甜，味道啱啱好！手羽雞翼塔， 有8件雞，皮脆肉嫩，係炸雞翼，配有酸忌廉醬，食嘅時候建議將塔上的雞翼掹咗落嚟先再食，炸粉唔厚，配酒一流。