莆田 (美麗華廣場2期) (已結業)

一段時間冇去尖沙咀，發現美麗華入邊嘅鋪頭轉晒，都幾多嘢行。新開嘅食肆都好多選擇，行過呢間喺新加坡拎過米之蓮一星嘅餐廳，食福建菜幾特別就排隊試吓。等左十幾分鐘就有位，有一碟酸菜做前菜，鹹鹹酸酸幾開胃。餐廳做緊海蠣節推廣，188可以揀兩款用生蠔整嘅餸。我哋叫咗江口家鄉海蠣湯同九層塔香燜海蠣。湯即係番茄蛋芫荽生蠔湯，出奇地一啲都唔腥，生蠔好鮮甜，唔錯。薑蔥燜蠔改咗用金不換，又幾出色，香氣十足，雖然生蠔細細隻，但味道又惹味蠔肉飽滿，出色。百秒黃花魚，名副其實師傅功夫菜，黃花魚滑到不得了，煮嘅時間非常準確。鍾意食魚嘅男朋友食唔停口。興化米粉，係好幼細嘅米粉好似台灣早餐店炒米粉。但呢一個係豪華版，入邊有好多海鮮好似蝦，蜆，元貝等等，值得一試。酥炒芋芯，芋頭夠粉，外面糖漿落得剛剛好，唔會一大層死甜，反而多咗一種香脆。另外值得一提嘅係茶都同外邊唔一樣，問侍應先知今日我哋飲嘅徐杞子菊花茶，養目安神！總括嚟講呢間店舖菜式有特色，下次會再嚟試吓其他嘢先。