影片
更多
2017-03-10
1641 瀏覽
有人食為咗裹腹，食得飽就算；進一個層次，就有人食為咗嚐味，裹腹之餘，感受食物嘅細緻味道；再進多一個層次，就可能喺細賞、細聽、細味嚟享受一餐飯。法國菜用料精，做法細膩，晌飲食界一向享負盛名；日本菜同樣有著做菜一絲不茍嘅精神，賣相更喺一絕，當兩者走在一起，產生嘅火花會喺點？今晚到訪嘅Le Réve，絕對喺難忘嘅體驗，因為，食材之珍、賣相之美同時共享。一出電梯，完全無柱位嘅用餐區，餐廳嘅環境就一覧無遺，而電梯出口對正就喺酒吧區，酒吧嘅後方印着店名，確定自己無嚟錯。整個環境晌柔和嘅燈光下，加上聚焦燈嘅配合，襯上絲絨梳化椅，石製餐枱，以及餐廳近尾擺設嘅花藝，令到環境非常有氣氛、有情調。當然，最欣賞喺啲聚焦燈所射向嘅位置，正正落在枱上，對相機先食嘅朋友好重要。廚房設晌餐廳尾，特色之處喺開放式，完全睇到廚師們做菜嘅情況，見得到佢哋嘅互動、專注同用心，不過為免騷擾佢哋做菜，只有遠距離少少影張相作補充。室內以外，亦有室外悠閒嘅梳化位，藤椅+咕咪就喺悠閒嘅組合囉，而且，仲有張特大嘅鞦韆吊椅，天氣涼涼哋坐晌度，搖吓搖吓，不知幾爽。不過，晌得露天，就預咗喺俾啲客食煙，所以，趁無人時影兩張相留個記錄。除咗環境
一出電梯，完全無柱位嘅用餐區，餐廳嘅環境就一覧無遺，而電梯出口對正就喺酒吧區，酒吧嘅後方印着店名，確定自己無嚟錯。
整個環境晌柔和嘅燈光下，加上聚焦燈嘅配合，襯上絲絨梳化椅，石製餐枱，以及餐廳近尾擺設嘅花藝，令到環境非常有氣氛、有情調。當然，最欣賞喺啲聚焦燈所射向嘅位置，正正落在枱上，對相機先食嘅朋友好重要。
廚房設晌餐廳尾，特色之處喺開放式，完全睇到廚師們做菜嘅情況，見得到佢哋嘅互動、專注同用心，不過為免騷擾佢哋做菜，只有遠距離少少影張相作補充。
室內以外，亦有室外悠閒嘅梳化位，藤椅+咕咪就喺悠閒嘅組合囉，而且，仲有張特大嘅鞦韆吊椅，天氣涼涼哋坐晌度，搖吓搖吓，不知幾爽。不過，晌得露天，就預咗喺俾啲客食煙，所以，趁無人時影兩張相留個記錄。
除咗環境睇到花心思之外，餐具亦喺值得留心嘅一環，盛菜嘅餐具唔講住，一陣分享每道菜時就可以欣賞到。而一坐低，餐枱上嘅擺設，如枱中央嘅朴葉、雅致嘅蠟燭燈、麵包碟嘅火山石、塗牛油用嘅木刀均引人注目，甚至連餐巾都捲得型格過人。
至於食物方面，像好多高級餐廳咁只有套餐供應，有人覺得會選擇少，但亦有人覺得讓廚師做得更專注，質素更穩定。套餐分為4道菜（$480）、6道菜（$780）及8道菜（$1,080）三個選擇，主菜揀選鹿兒島A5和牛西冷則需額外多付$280。
Amuse bouche食法國菜，晌餐前梗有個做得精巧、食你唔飽嘅開胃小品，佢又唔算前菜嚟，就好似上酒樓食中菜時，一坐低就擺低幾小碟酸菜、花生咁，當然，法國菜就唔會咁簡單啦，除精緻，仲要好食。北海道吞拿魚蓉，配少少洋蔥粒，鮮爽清新，志在喚醒一下嘴巴。
Bread麵包有小圓麥包（當然唔喺港式嗰啲啦）及小法包，店員稱喺自家製，拿上手熱烘烘，前者麥香豐厚帶點粗獷感，後者則外脆包心軟綿，搽啲牛油已有種小滿足。不過，最特色喺以布袋包實奉客，既保溫，又別緻，而且，擺晌一片日本朴葉之上，有份優雅美。
Beef tartar (6 / 8 courses)(Beet and chicken liver gel - Red onion gel - Cucumber sauce - Capers powder)
有無種窩蛋牛肉嘅感覺呢？店員上菜時介紹，牛肉他他用上日本和牛，初以為喺鵪鶉蛋嘅蛋黃，其實喺幾款蛋打勻再以分子料理造型，此外，以一塊米色大石板作盛器，白色喺青瓜柳做嘅粉末，並伴上3款醬汁：紅菜頭雞肝醬、紅洋葱醬及青瓜醬（左至右），賣相猶如一塊調色板，非常美觀。將牛肉他他跟「分子」雞蛋調勻，入口有份好滑溜嘅口感，肉嘅「生」鮮感盡出，幾款醬配牛肉他他食，個人就較喜歡青瓜醬嘅清爽感。
Beef tartar
17 瀏覽
0 讚好
0 留言
Foie gras (6 courses)(Foie gras terrine - Reduction from white wine vinegar - Apple and fig confit)
鵝肝喺法國菜嘅代表性食物，相信無乜人質疑，晌好多法式套餐，頗多時候喺以煎鵝肝為主導。而用上鵝肝醬，落晌Le Rêve嘅手，又會變成點？盛載鵝肝醬嘅大石盤無想像中咁重，但鵝肝醬、無花果肉、蘋果乾、蘋果粒、紅薑絲拼埋一齊，賣相立體，猶如一件藝術雕塑；鵝肝醬拼少少無花果肉或蘋果粒，豐膩中有份甜，鵝肝醬拼少少紅薑絲，濃香中有份微辣，化學效果更強，可謂味道紛陳。
Foie gras
26 瀏覽
0 讚好
0 留言
Langoustine (8 courses)(Silver trail - Coconut - Melon and shellfish gel - Wasabi ice-cream - Sliver powder)
將海螯蝦做成刺身，再以火槍輕輕一辣，入口鮮甜爽口，但又有一層輕輕嘅焦香，非常精彩，不過，講到驚喜就唔及啲日式芥末雪糕，柔滑到不得了，但嗰朕芥末味卻喺若隱若現咁，十分過癮。雪糕底下仲有啲好似平時食中華沙律嘅日本海藻咁，爽爽哋，但色澤深好多，就喺啲蜜瓜跟貝類做成嘅啫喱條。
Langoustine
20 瀏覽
0 讚好
0 留言
Sea Cucumber (8 courses)(White peach – Grapefruit - Smoked tomato shellfish pond - Porcini pure)
屬8道菜嘅菜式，海參依樣食材，晌西菜比較少用，但食慣中菜嘅港人就絕不陌生。貫徹如一，賣相永遠有亮點，伴以幾款醬汁：白桃醬、西柚醬、芥末……而海參本身無乜味，所以，大廚就以煙燻蕃茄醬襯托，海參非常軟腍柔綿，沾上唔同嘅醬汁，都有唔同嘅感覺。此外，伴碟一片薄薄搵牛肝菌做嘅脆片，跟食紫菜有點相似。
Sea Cucumber
17 瀏覽
0 讚好
0 留言
Lobster (6 / 8 courses)(Celery cube - Grapefruit crystal - Shellfish veloutee)
龍蝦淨肉上就梗喺食得方便稱心啦，蝦肉十分爽彈，蘸一蘸龍蝦泡沫故然令蝦味更上一層樓，味道更濃郁；然而，伴以西芹啫喱粒及西柚水晶，透過龍蝦嘅餘溫溶一溶，一齊放入口令龍蝦嘅鮮味更突出，好精彩嘅一道龍蝦菜式。
Lobster
12 瀏覽
1 讚好
0 留言
Amadai (6 / 8 courses)(Mussels’ sauce - Baby veggies)
金目鯛喺幾高級嘅日本魚產食材，用上法式手法處理，效果會點？先以大大隻日式瓷碗盛載，個碗仲好熱添，魚肉入口細緻嫩滑，魚味濃、油脂豐，其次，專登淋上滾油讓魚皮有炸嘅效果，喺一個精彩位，咬落卜卜聲，脆得交關；再配一個法式青口汁，可謂有畫龍點睛之效。
Amadai
17 瀏覽
0 讚好
0 留言
A5 Kagoshima wagyu sirloin (+$280) (6 courses)(Beef in Mirin - Cucumber sunomono - Ox tongue puree - Japanese saffron)
鹿兒島和牛西冷要上七乘熟，放晌甚富東瀛味嘅陶瓷紅碟，非常吸晴。本來伴菜有日本青瓜，但貨源問題改為紅菜頭，一樣啱心水，而醬汁用咗甚少試到嘅牛脷醬，味道比較濃，亦襯到啲和牛，再加少少日本蕃紅花做裝飾。和牛以味醂醃過，煎過後仲有微微酒香，雖然七乘熟，但質感依然嫩滑，油脂豐厚而平均，入口滿口油香。
A5 Kagoshima wagyu sirloin
16 瀏覽
0 讚好
0 留言
Prime short rib (8 course)(Ratatouille - Salsa verde)
比較起兩個「主菜」，我就覺得我揀嘅小牛排好食啲，小弟食得幾生吓，五乘熟喺我嘅心水生熟度，睇見啲肉色鮮潤嫩紅，卻一點血水都無滲出嚟，就知大廚嘅經驗同手勢幾了得。落刀已感受到啲肉質幾咁柔嫩，入口唔止軟腍，肉味濃郁，外層燒得脆口，實在一流。伴菜有少少燉雜菜，用嚟平衡一吓啲肉，而醬汁選擇青醬，香草味濃，配濃味嘅肉亦喺相襯。
Prime short rib
18 瀏覽
0 讚好
0 留言
Snow white (6 course)(Citrus gel - Lime sorbet - Lemon meringue - White chocolate powder)
6道菜嘅晚餐就只有一款甜點，就喺依一道「白雪」，店員介紹時，話大廚嚟自德國，知道香港喺無雪落嘅地方，就設計出依一款甜點，以白朱古力球、青檸雪葩、橙味啫喱、檸檬蛋白餅及白朱古力粉末組合而成，更刻意用咗米白色嘅瓦碟，外觀頗有意景。雪葩爽酸，正好中和下白朱古力嘅甜，而檸檬蛋白餅非常有驚喜，清新得嚟好鬆脆，橙味啫喱淡淡橙香，整體讓人有唔同味感、唔同口感嘅體驗。
Snow white
14 瀏覽
0 讚好
0 留言
The devil (8 course)(Chocolate ganache - Beetroot sorbet - Mint crumble - Amaretto caviar)
至於8道菜嘅晚餐則有兩款甜點，絕對滿足到嗜甜嘅朋友，先上場喺名為「魔鬼」嘅作品，單睇餐牌所列出嘅成份組合，已經喺魔鬼誘惑。主體喺沾滿紅莓乾粒粒嘅朱古力魔鬼棒及紅菜頭雪葩，前者酸香嘅莓乾下，彈出濃郁嘅黑朱古力甘苦味；後者似雪糕多過似雪葩，但紅菜頭味好突出，雪葩上嘅「魚籽」，喺分子料理所做嘅杏仁酒珠珠，酒味都幾濃烈，唔止點綴咁簡單，不過，薄荷金寶就無做到出嚟，改咗一抹朱古力醬墊底。
The devil
12 瀏覽
0 讚好
0 留言
Glamour (8 course)(White chocolate - Sphere from berries in Porto)
是夜最後一道菜「魅力」，絕對可以用精彩到尾嚟形容，睇落比起對上兩款甜點好似無咁多花臣嘢，但製作仍然咁細緻用心，放少少金箔令個賣相高貴好多。下層嘅白朱古奶凍，做得圓滑，入口香甜順滑，而且香味自然，反一反底見到密密麻嘅雲呢嗱籽，就明白究竟；上面棗紅色嘅雜莓球，喺以分子料理做成，輕輕一篤外衣，鮮活嘅雜莓漿即時湧流而出，伴奶凍一齊食，無可挑剔囉。
Glamour
24 瀏覽
0 讚好
0 留言
Coffee餐飲就點杯熱咖啡嚟嘆吓，今次無特別要求，只喺要杯即磨咖啡就可以喇。不過，套咖啡杯睇落喺上等貨，線條幼細，糖罌亦好別緻，牛奶都加熱過，可講喺服務務求做到足。
Mignardises法國菜食到尾，會有啲法式小甜點俾客人伴咖啡或熱茶，有時會叫Petits fours，有時會叫Mignardises，不過今次就無「Fours」喇，兩款甜點喺日本代表嘅麻糬及法國代表嘅金磚小蛋糕（Financier），每件做到一小口呎吋，麻糬煙韌沾滿黃豆粉，小蛋糕口感濕潤有杏仁香，最好喺兩者都少甜可口。
Le Réve解作「夢想」，依間餐廳嘅誕生，唔知喺唔喺為店主完夢呢？晌度用餐，真喺無論食材用料、菜式配搭、賣相構想、創意心思、廚藝功夫、服務水準都叫人難忘。遇着特別嘅紀念日，好值得嚟好好享受一餐咁有特色嘅法日晚宴。
張貼
