Dodam Chicken (1亞太中心) (已結業)

前排疫情關係少咗出街食飯。 今日喺觀塘行街，lunch time經朋友介紹到呢間韓式餐廳食飯。餐廳雖然喺三樓，但搭電梯一出就會見到，非常易搵。餐廳座位非常闊落，坐得非常舒服 。餐廳景觀開揚，望向裕民坊，食飯食tea傾計環境一絕。今日叫咗蜂蜜牛油炸雞、芝士火山熔岩飯同埋泡菜海鮮煎餅。 所有午市套餐都會附送飲品一支。飲品除咗熱柚子蜜外，仲可以喺雪櫃入面挑選，選擇非常多。另外餐廳亦設有自助mini bar，當日有泡菜同炒粉絲供應。炒粉絲軟硬適中，質感彈牙，值得一試。泡菜對香港人而言味道可能偏辣，建議先攞少量試試再睇下要唔要添食。餐廳上菜速度好快，落單後拎完前菜無耐炸雞就上枱。餐廳嘅蜂蜜牛油炸雞蜂蜜係以焦糖嘅方法上上雞件，相比一般快餐店嘅炸雞有另類脆脆嘅口感。但如果想食返快餐店炸雞嘅口感，餐廳亦有對應口味可供選擇。泡菜煎餅更為出色。煎餅煎得非常脆身，而且上枱之前店員已經用刀切開一件件避免食客拎起嘅時候令煎餅碎開。最後上枱係芝士熔岩炒飯。芝士混喺蛋層之間，避免芝士失溫過快，但上枱後仍然建議優先食用。餐廳設有吧檯，但因為疫情無開。相信疫情緩和之後會係附近上班一族happy hour嘅好地方。