Plato Cafe & Bistro (裕民坊YM²)

呢間餐廳之前同老公在佐敦食過，都幾有口碑，咁我就揀觀塘呢間分店同朋友食生日飯。餐廳裝修好新，空間好大。餐牌選擇都幾多，有兩款二人套餐，有十多款晚市套餐，仲可以散叫。朋友發辦，叫左個二人精選套餐，包是日餐湯、一款前菜，一款飯或意粉、一款主菜、是日甜品同兩杯飲品。是日餐湯：鹹鹹地，幾夠味。煙三文魚凱撒沙律：有三大塊煙三文魚，羅馬生菜新鮮爽口，裡面加左芝士粉同煙肉粒，幾好味。北海道帶子松露野菌意粉：帶子煎得香，食到有好多菇，意粉煮得軟硬適中，啖啖充滿露松醬汁，好滑好creamy。澳洲肉眼牛扒：叫左七成熟，肉質厚實帶少少肉汁，唔韌。旁邊仲有個焗薯，配上蛋王醬同煙肉粒，味道都幾夾。芝士蛋糕：係new York cheese cake，口感實正，唔太甜，幾好。飲品：朋友叫左個凍冰果茶，佢話飲到好多唔同生果味道，我就叫左凍蜂蜜柚子茶，唔太甜，都OK。