越南牛肉粉專門店 (已結業)

年廿九中午上岸，人有點冷，不餓，只想吃得人和暖一點，打算去生記食粥，離遠看到這裡的招牌，捨粥取湯河。被安排坐在通道。想落單，第一個阿姐目不斜視直行直過，第二個瞄一瞄我，第三個對我講：「一陣！我依家無簿喎。」佢行番轉頭，同我落個生牛肉湯河。等十五分鐘，終於到我。阿姐話：「生牛肉湯河。」放低碗，走咗。我問另一個：「呢個係……」「生牛肉湯河！」你兩個都咁話咯，我惟有開始食囉。湯好熱，味算係咁不特別鮮囉；牛肉熟過頭，直頭係韌噃；湯粉一舊痴喺底，似放咗落碗好耐喎。用筷子將粉揚散，湯冷得快咗好多。唔係噃，少咗比個籃我，要問，阿姐先去攞。粉都滑。落完九層塔個湯好味咗。湯上桌時很熱很熱，又蓋過了所有牛肉，難怪肉韌如湯渣。湯沒有下味精罷，味道幾好但不是全港頭三名，但對於一個不太餓又想暖身的人來說是寶來，我未吃粉己喝掉一半，到後來一滴也不剩。好似淨係我唔好彩因為我見之後人哋嗰六七碗生牛肉湯河都係半生熟。招呼並不算好，加上30蚊食碗湯粉有點貴（是湯加粉哦。相信我，過熟的牛肉就算薄切還是真的很韌。）。不是差，但我…………二次不會來。