龍記飯店 (已搬遷) 新店位置

番咗嚟香港做嘢有半個多月，都未去過中環一帶食過嘢。是日趁著阿K遲咗放工嚟唔切煮晚飯，我就提議去中環附近簡簡單單咁食番餐。唔駛响屋企煮餸，無論對阿K或者係我都係一件好事。我地去到擺花街附近一邊行，一邊睇吓店舖外面嘅宣傳介紹。此文報導嘅燒味店宣傳標榜「楊貫一」幫襯過，出動到阿一，我地諗呢度嘅水準唔會差到哪裡去，所以我地決定嚟一趟「燒味晚飯」。我食親燒味，一定會揀「叉肉飯」，因為一間燒味舖嘅水準，大部分都可以响「叉燒」同埋「燒肉」呢兩大主力可以窺見。叉燒我就嗌咗半肥瘦，外表嘅色澤唔會太人工化，脂肪分佈平均，咁好嘅豬肉，已經成功咗一半；蜜汁又冇落得過多，味道可謂拍得住灣仔嘅「再興」。另一方面，燒肉嘅水準就差很遠了，燒肉皮唔夠脆，可能係整咗太耐，唔新鮮嘅緣故，最弊就係瘦肉部分十分之鹹，簡直係「鹹得冇道理」、「瑜不掩瑕」。算了吧！這一頓飯都係廿五蚊咁上下，唯有安慰自己「好嘅一餐，唔好嘅又係一餐」，無需太計較啦！