東門冰室 (已結業)

一間紅磡真正有歷史嘅冰室，每一格階磚，每一張木枱木凳都上哂年紀，好喜歡☺️。小編已經等一次食「東門冰室」可能已經7、8年前，唔係日日嚟嘅常客，但久唔久會食，阿姐都認得啦😆。一般幫襯其實都係熟客多，冰室嘅餐牌只係裝飾品，因為只有生客先會點餐牌上面嘅普通野😂。而且如果你嗌火腿通，阿姐會話「呢啲唔好食㗎！」，佢係真係會唔比你點😂，阿姐係惡啲語氣重啲，不過佢唔係鬧嘅，只係心急想推介自家最正嘅食物咋😘。煎鱆魚餅 炒牛肉 紅腸 伊麵茶走(共$43)••••••內行人先識嗌嘅組合，非常非常有誠意。有兩條靚生菜，鱆魚餅煎過，切片，係有鱆魚粒甜甜地嘅魚餅😋。牛肉炒過好香🤤，肉質鮮有少少牛肉甜香，半滑半肉感，唔覺落鬆肉粉。紅腸唔係煎過咁簡單！係落左蒜蓉煎香！肯定去其他餐廳搵唔到，平時最多白烚。連隔離枱姨姨見到小編啲紅腸咁吸引，都即刻加單😘。伊麵係福字伊麵，麵硬度啱食，麵底比一丁細個，大食人士可能要嗌多件多士。茶走真心好好好好飲！簡單，茶香奶滑，茶膽高質，好難得，要知道有好多幾十年嘅茶記都做唔到一杯好茶。